Paplajahan 7: Tresna Asih Para Kramane tatkala Maurip ring Pengajahan Sang Hyang Yesus
Roma 12:1-21
Surat puniki katulis olih dane Paulus majeng ring para krama druen Sang Hyang Yesuse ring Kota Roma. Daging surate puniki indik manusane nenten wenten sane patut ring ajeng Sang Hyang Pengardine. Samaliha iraga nenten mresidayang patut malantaran ninutin ukum agama Yahudine. Iraga mresidayang patut ring ajeng Sang Hyang Pengardine wantah malantaran pracaya ring Sang Hyang Yesus Kristus kamanten. Kenten pada, dane Paulus mituturin kramane irika sekadi puniki:
7
Duh para semeton, Sang Hyang Pengardi sampun muktiang welas asih Idane malantaran Sang Hyang Kristus. Punika mawinan tiang nesek ragane: Laksanayang ja napi sane suci tur patut saenune ragane maurip. Indike punika dados aturan sane ngranayang Sang Hyang Pengardi seneng. Malantaran maurip sekadi punika, ragane nyembah Sang Hyang Pengardi antuk cara sane patut. 2 Sampunang ja ragane ninutin paindikan sekala sane jaat ring jagate puniki. Nanging banggiang ja papineh ragane kadadosang anyar olih Sang Hyang Pengardi, mangda ragane uning pikayunan Idane. Ida mapikayun mangda ragane malaksana napi sane becik tur sempurna, inggih punika napi sane ngranayang Ida seneng.3 Sang Hyang Pengardi sampun ngicen wara nugraha mangdane tiang prasida ngamaosang kapining ragane sami sapuniki: sampunang ja ragane marasa lebih utama katimbang sane sapatutne. Nanging sikutin ja dewek ragane manut agengne kapracayaan ragane sane sampun picayang Sang Hyang Pengardi ring ragane suang-suang. 4 Iraga suang-suang madue raga asiki sane madue anggota akeh tur sebilang anggotane punika madue tategenan sane malian-lianan. 5 Kenten pada iraga sami, yadiastun iraga sareng akeh, nanging iraga sami dados asiki krana iraga masikian sareng Sang Hyang Kristus. Lan iraga suang-suang madue ubungan sareng warga lianan sane masikian sareng Sang Hyang Kristus. 6 Sekadi punika iraga suang-suang madue pica rohani sane malianan. Pica rohani punika kapicayang manut sekadi wara nugraha saking Sang Hyang Pengardi.
Yening pica rohani ragane ngortiang pabesen saking Sang Hyang Pengardi, sapatutne ragane nganggen picane punika, amongken ja gedene kapracayaan ragane.
7 Kenten pada yening pica rohani ragane nulungin krama druen Sang Hyang Yesuse, sapatutne ragane mapitulung.
Yening pica rohani ragane ngajahin, sapatutne ragane ngajahin.
8 Yening pica rohani ragane ngibur manah anak lianan antuk welas asih, sapatutne ragane ngibur anake punika.
Yening pica rohani ragane mangda mapakidihan sid anake lianan, sapatutne ragane nglaksanayang antuk manah sane tulus.
Yening pica rohani ragane dados pemimpin, sapatutne ragane dados pemimpin sane anteng.
Yening pica rohani ragane malaksana welas asih, sapatutne ragane nglaksanayang antuk manah sane liang.
9 Sampunang ja tresnan ragane palsu. Kelidin ja napi sane jaat. Lan setata ja nglaksanayang napi sane becik. 10 Saling welas asih ja sekadi kaluarga asiki. Ajiang ja anake lianan lebihan kapining ngajiang dewek ragane padidi. 11 Sampunang ja mayus nanging anteng ja makarya. Utsahayang ja ragane ngayah antuk manah sane saat; ayahin ja Sang Ratu Agung. 12 Masukarena ja ritatkala ragane nyantosang janjin Sang Hyang Pengardine. Sabar ja ritatkala nanggung pakeweh. Satya ja nunas ica. 13 Tulungin ja krama suci lianan sane kakirangan. Terima ja sebilang tamiune sid umah ragane.
14 Tunas icayang ja anake sane nyengsarain ragane lan sampunang ja mastu ipun. 15 Masukarena ja sareng anake sane sedek masukarena. Sebet ja sareng anake sane sedek sebet. 16 Maurip ja paras-paros sareng semeton sane lianan. Sampunang ja sumbar, tur masawitra ja sareng anake sane kaanggep nista. Sampunang ja ngrasa dewek ragane dueg. 17 Yening wenten anak sane malaksana jaat kapining ragane, sampunang ja ngwales antuk parilaksana sane jaat. Waspada ja mangda malaksana napi sane kaucap becik olih anake makasami. 18 Sasidan-sidane, utsahayang ja mangda maurip dame sareng anake makasami.
19 Para semeton sinamian sane tresnain tiang, sampunang ja ngwales jaat antuk jaat. Banggiang ja Sang Hyang Pengardi ngwales manut murkan Idane, krana sampun katulis ring Cakepan Sucine sapuniki,
“Nira sane ngakimin manusane sane iwang;
Nira sane ngwales ipun.”
20 Nanging taler wenten katulis,
“Yening musuh cening seduk, icen ja ipun ajengan.
Yening ipun bedak, icen ja ipun inuman.
Yening cening maparilaksana sekadi punika,
Cening nadosang ipun kimud.”
21 Sampunang ja ragane kalah olih paindikan sane jaat. Nanging kalahang ja paindikan sane jaat antuk parilaksana becik.
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal ring ceritane puniki?”
ii. “Napi sane plajahin iraga indik manusa saking ceritane puniki?”
iii. “Sekadi napike sapatutne iraga nyalanang idup manut pengajahane puniki?"
iv. “Kapining sirake sapatutne iraga nyeritayang malih ceritane puniki?”